Begiak itxita eraman dute Maria Jesus Beasainen egindako omenaldira

Segura Irratian 40 urtetik gora esatari lanetan aritutako Maria Jesus Telleriak entzuleen omenaldia jaso du 'Asko Maite Zaitut' saioaren bidez. 'Kalejira' irratsaioa aurkeztu zuen hainbat urtetan, eta entzuleak lagun bilakatzea lortu zuen.

'Kalejira' saioaren ardatza entzuleen deiak izan ziren urte askotan. Gipuzkoako herri askotatik deitzen zuten irratsaiora, eta horietako batzuek astero egiten zuten deiren bat lagunak agurtzeko, norbaiti urtemuga zoriontzeko eta abar. Batzuk, gainera, elkar ezagutzera iritsi ziren, Segura Irratiari eta Maria Jesus Telleriari esker, eta lagunarteko harremana egin zuten.

Maite Zubelzo eta Juanita Lopetegi buru zituztela, omenaldi berezia egin nahi izan diote Maria Jesusi entzule horiek guztiek. Eta, azkenean, kamera ezkutuan oparitutako tarta norena den jakin ahal izan du Maria Jesusek. Beasaingo Igartza jauregi ondoko jatetxean kafe bat hartzeko gelditu da entzuleetako batekin, eta ahots batek gidatuta, jauregiraino joan behar izan du. Han begiak itxita sartu da, eta zapia kentzean, entzule eta lagun dituen guztiak ikusi ditu. A zer ezustekoa! Maite dutela eta "eskerrik asko" esan diote lagun guztiek.