Euskal Telebistak 'El Retro Visor' estreinatuko du gaur gauean

Euskal Telebistak 'El Retro Visor' erreportaje saila estreinatuko du gaur gauean. Bertan, atzera begirako bidaia egingo dute astero euskal gizarteko pertsonaia ezagunek, euren oroitzapen eta bizipenen bitartez. Memoria ariketa gogorra egin beharko dute protagonistek euren haurtzaro eta gaztaroan bizitakoak gogoratzeko. Denetariko gaiak jorratuko dituzte: lehengo atal honetan, jolasak, eta hurrengoetan, lehenengo jaunartzea, sukaldaritza eta janariak eta udako oporraldiak, besteak beste.

Protagonistak atal guztietan berdinak izango dira, eta bikoteka arituko dira: Jose Luis Korta eta Olga Zabalgogeaskoa, Jabo Irureta eta Maribel Salas, Jon Uriarte eta Paloma Zorrilla, Eduardo Iturralde eta Angelita Alfaro, eta Gorka Aginagalde eta Arantza Furundarena.

Haurtzaroko oroitzapen eta gertakariak gogoratzeko, garai hartako argazki pertsonalak erakutsiko dituzte protagonistek. Horrez gain, Euskal Filmotekak partikularrek Super 8an grabatutako irudiak utzi dizkio saioari, 60, 70 eta 80ko hamarkadetako bizitza nolakoa zen erakusteko oso lagungarriak izango direnak.

Lehen saioa: ¡Qué bello es jugar!

Lehenengo saio honetan, protagonisten haurtzaroko jokoak gogoratuko dituzte. Garai hartan beste modu batera jolasten zela erakutsiko dute, gaur egun baino jostailu gutxiagorekin. Haurrek sormena gehiago lantzen zuten, taldeka aritzen ziren eta kalean ibiltzen ziren jolasean.

Kaniketan, tortolosekin, zibota jaurtitzen, sokasaltoan, txapetan edota kinkinean nola jolasten zuten gogoratuko dute. Garai hartan arriskurik ez zegoela sentitzen zuten, eta amek merkromina mirarigilearekin sendotzen zituzten haurrek jolasean egindako gerra-zauriak. Gurpil gainean aske sentitzeak, burdinezko patinetan, bizikletan edo goitibeheratan, arriskuen aurrean neurriak hartzea baino askoz inportanteagoa zen.

Entretenimenduak ere bere tokia zuen etxean: gurasoak, anai-arrebak, bizilagunak eta lagunak etxean aritzen ziren Juego Reunidos, Monopoly edo bingora jolasten.

Bizipen haietatik euren oroitzapenik onenak gogoratuko dituzte protagonistek, eta denboran atzera bidaiatuko dira garai horietara itzultzeko.

'El Retro Visor' gaur estreinatuko da ETB2n eta eitb.eus-en, 22:15ean.