'Ausardia eskatzen dugu esateko hau injustua dela'

Espainiako Auzitegi Gorenaren epaiaren biharamunean, Euskadi Irratiko 'Faktoria'-n izan dira zigortutako Altsasuko zortzi gazteen senideetako batzuk: Antxon Ramirez de Alda (Adur Ramirez de Aldaren aita), Amaia Amilibia (Jon Ander Coben ama) eta Idoia Goikoetxea (Altsasukoak Aske).

Ramirez de Alda: "Mina egiten diguna zigorra da, eta esatea zigorra errespetatzen dutela baina ez gehiago; horrek ere mina egiten digu, izugarria. Guk ausardia eskatzen dugu esateko hau injustua dela. Denok errespetatzen dugu, baina injustua baldin bada, esan behar da".

Amilibia: "Kostatuko zaigu asimilatzea. Astakeria izan da hasieratik eta kolpe handiak jaso ditugu Justiziarengandik. Azala gogortu zaigu denoi, halabeharrez, bizirauteko".

Goikoetxea: "Altsasu oso egoera gogorra bizitzen ari da [...] Herri txikia gara, baina oso eskertuta gaude jendearekin, laguntzarekin eta elkartasunarekin".

Aurreratu dute mobilizazio bat egingo dutela aurki, epaiarekin ados ez daudela erakusteko. Gorenaren erabakiaz, Javier Ollo Altsasuko alkateak 'Faktoria'-n adierazi du "neurririk gabeko sententzia" dela.