Politika -

UDAL POLITIKA

PSNk atea itxi dio Lizarran zentsura mozioa aurkezteko aukerari

Nafarroako sozialistek oharra bidali dute urtarrilaren 26 honetan komunikabideek zabaldu duten aukera ez dela inolaz ere gauzatuko adieraziz.

Gonzalo Fuentes, Navarra Sumako alkatea, aginte-makila jasotzen, 2019ko ekainean.
Gonzalo Fuentes, Navarra Sumako alkatea, aginte-makila jasotzen, 2019ko ekainean.
Gonzalo Fuentes, Navarra Sumako alkatea, aginte-makila jasotzen, 2019ko ekainean.

EITB.EUS

Whatsapp Facebook Twitter Telegram Email

Lizarrako talde sozialistak erabat ukatu du Gonzalo Fuentes, Navarra Sumako alkateari zentsura mozioa aurkezteko aukera.

Komunikabideetara bidalitako ohar batean, Lizarrako PSNk "herriarekin duen konpromisoa" berretsi du eta udal taldea osatzen duten zinegotzien "helburu bakarra" "herritarrei mesede egingo dieten neurriak garatzeko modu propositiboan lanean jarraitzea" dela adierazi dute.

Jorge Crespo Lizarrako PSN-PSOEko udal taldearen bozeramaileak "Lizarrarekin eta Lizarrako bizilagunekin duten konpromisoa" berretsiz amaitu du oharra.

Beraz, itxita geratu da gaur Diario de Noticias de Navarra egunkariak kaleratutako albiste baten harira irekitako aukera edo polemika. Egunkariaren datuen arabera, Lizarrako sozialistak oso haserre leudeke Navarra Sumako udal ordezkariekin, "informaziorik ematen ez dietelako", besteak beste; eta horren aurrean, Lizarrako exekutibaren %70ak Gonzalo Fuentes alkatearen aurkako "zentsura mozioa aurrera ateratzeko beharko litzatekeen akordioa aztertzea" onartu zuen bilera batean. Zentsura mozioa aurrera ateratzeko, EH Bildu eta Geroa Bairen botoak behar lituzkete.

Koldo Leoz, Lizarrako EH Bilduko bozeramaile eta alkate ohiak Euskadi Irratiari gaur goizean adierazi dio eurak prest daudela euren botoak sozialistenekin batzeko baina zalantza handiak dituzte "Nafarroako zuzendaritzak Lizarrako sozialistei pausoa ematen utziko ote dieten".

Geroago, PSNren zuzendaritzarekin hitz egin du Euskadi Irratiak eta aukera hori ez dutela "inolaz ere" babestuko adierazi dute. Arratsaldean, oharra kaleratu dute jarrera hori berretsiz.

Navarra Sumako Alkatetza

2019ko maiatzaren 26ko udal hauteskundeen ondotik, ekainaren 15ean osatu ziren udalak Nafarroan. Lizarran, EH Bilduren legegintzaldiaren ostean, Navarra Sumak hartu zuen Alkatetza, Gonzalo Fuentes buru zuela. Zerrenda bozkatuena izan zen Fuentesena (17 zinegotzitatik 7), eta EH Bilduk (6) eta Geroa Baik (1) PSNren (3) babesa behar zuten botereari eusteko, baina PSNko zinegotziek euren buruari eman zioten botoa eta Fuentesek eskuratu zuen Alkatetza.

Une hartan, PSNk EH Bilduri ezarritako betoak Navarra Sumari egin zion mesede, baina gutxiengoan geratu zen agintean. Ondoren, Navarra Sumak eta PSNk akordioa lortu zuten udaleko 10 batzordeetako presidenteak banatzeko (7 Navarra Sumarentzat eta 3 PSNrentzat), baina enfrentamendu ugari izan dituzte, antza denez, azken hilabeteotan.

Hau zure interesekoa bada, baliteke beste gai hauek ere izatea
Politika PSN Geroa Bai Nafarroa EH Bildu Eguneko albisteak Albisteak Lizarra Udal eta foru hauteskundeak 2023 EAEko eta Nafarroako Udal eta Foru Hauteskundeak emaitzak Nafarroako udal eta foru hauteskundeak Navarra Suma