Mundua -
UKRAINAKO GERRA
Errusiak iragarri du 100 "mertzenario atzerritar" hil dituela Donetsken egindako eraso batean
Txasiv Yar hirian izan da erasoa. Ukrainaren esku dago udalerria, eta liskar gogorrak izaten ari dira azken egunetan.
AGENTZIAK | EITB MEDIA
Errusiako Defentsa Ministerioak iragarri duenez, "100 mertzenario atzerritar" hil dituzte doitasun handiko misilekin egindako eraso batean, Txasiv Yar hiriaren inguruan, Donetsk eskualdean.
"100 mertzenario atzerritar eta sei ibilgailu blindatu suntsitu dituzte Txasiv Yar eremuan, Indar Aeroespazial Errusiarrek doitasun handiko armekin egindako eraso batean, Legio Atzerritarra deritzona egoten den gunean", adierazi du Errusiako Armadaren bozeramaile Igor Konaxenkov jeneralak.
Ukrainaren kontrolpean dagoen hiri txiki horretan, liskarrak izan dira azken egunotan. Ukrainar Gobernuak salatutakoaren arabera, joan den larunbatean, gutxienez hiru pertsona zauritu zituen Errusiak misil batekin apartamentu bat jota.
Halaber, Konaxenkov jeneralak jakinarazi du, Donetsketik kanpo, Ukrainako sei aginte-posturen aurkako erasoak ere egin dituztela, Kherson eta Kharkiv eskualdeetan.