Gizartea -

Osasuna

Medikuen sindikatuek greba baztertu dute, baina abisatu dute Lehen Arretan egoerak "eztanda" egin dezakeela

"Europara joaten diren medikuen fabrika bihurtzen ari gara", gaitzetsi du Mabel Arciniega Euskadiko Sendagileen Sindikatuko idazkari nagusiak. Profesionalen "baldintzak duintzeko" eskatu dute.

Sendagileen sindikatuen prentsaurrekoa Madrilen. Argazkia: EFE
Sendagileen sindikatuen prentsaurrekoa Madrilen.
Sendagileen sindikatuen prentsaurrekoa Madrilen. Argazkia: EFE

Agentziak | EITB Media

Whatsapp Facebook Twitter Telegram Email

Espainiako Estatuko medikuen sindikatuek, tartean, Euskadiko Sendagileen Sindikatuak, Lehen Arretako lankideak hainbat autonomia erkidegotan egiten ari diren protestak babestu dituzte, baina oraingoz ez dute grebarik deituko.

Euskadiko Sendagileen Sindikatuak bilera egin du Medikuen Sindikatuen Estatuko Konfederazioarekin (CESM), Andaluziako Medikuen Sindikatuarekin eta Kataluniako Metgesekin. Ondoren, sindikatuek Osasun Ministerioari eskatu diote haien aldarrikapenak entzuteko, eta lan baldintzak hobetzeko.

Azaldu dutenez, medikuen sindikatuen eskaerak hainbat autonomia erkidegotako Lehen Arretako mobilizazioetatik bereizita daude. Tomas Toranzo CESMko presidenteak azaldu duenez, osasun langileen lan baldintzak arautzen dituen esparru estatutuaren aldaketara mugatzen dira beren aldarrikapenak.

Hala ere, Toranzok argitu du lankideen mobilizazioak babesten dituztela: "Ezinegona dago, eta ez litzateke harritzekoa izango erkidego batzuetan ikusten ari garen mobilizazioak beste batzuetara zabaltzea".

Edozein kasutan, unea iristen denean Ministerioak euren eskaerak aintzat hartuko ez balitu, ez dute zalantzarik izango greba deitzeko, "behar izanez gero". "Baina orain ez da momentua", ez baitituzte "negoziazio hauek mobilizazioekin hasi" nahi.

Sindikatuen arabera, irtenbidea profesionalen "baldintzak duintzea" eta aurrekontua handitzea da. Izan ere, Lehen Arreta eta osasun sistema "eztanda egin dezakeen bolborategi bat dira, eta, hain zuzen ere, leku batzuetan eztanda egiten ari da, inork ezer egiten ez badu".

Mabel Arciniega SMEko idazkari nagusiak gogorarazi duenez, 15 urtean, graduatuen kopuruak % 167 egin du gora, baina aurreko MIR deialdian, 3.700 hautagai baino gehiago kanpoan geratu ziren, eta, gainera, 218 plaza hutsik geratu ziren, ia guztiak familia medikuntzakoak.

Gainera, iaz 3.790 profesionalek alde egin zuten, eta, beraz, konponbidea ez da unibertsitateetan plaza gehiago sortzea, sistemaren beharretara egokitzea baizik. "Europara joaten diren medikuen fabrika bihurtzen ari gara", gaitzetsi du.

Medikuen sindikatuek urteak daramatzate estatutu independente bat (A+) eskatzen, lanaldi osagarria, guardiak, hautaketa sistema, baldintzen homologazioa eta 70 edo 72 urtera arteko erretiro malgua eta borondatezkoa arautzeko.

Sagarduik mediku gehiago eskatu ditu

Bestalde, Gotzone Sagardui Eusko Jaurlaritzako Osasun sailburuak konponbideak eskatu ditu, eta ez errudunak bilatzea, Larrialdietako eta Lehen Arretako medikurik ez dagoelako.

Madrilen bilera egin ostean, Estatu osoan Lehen Arretan eta Larrialdietan gabezia estaltzeko medikuen kopurua handitzeko premia azpimarratu du. "Ez da epe ertainera edo luzera itxaron behar", esan du.

"Abuztuan neurri batzuk proposatu genituen, Galiziako kontseilariarekin batera egin nuen. Profesional kualifikatuak ugaritzearen bidetik zihoazen, espezialitate jakin batzuetako gabezia bete ahal izateko", adierazi du.

Hau zure interesekoa bada, baliteke beste gai hauek ere izatea
Osakidetza Gizartea Ekonomia Eguneko albisteak Albisteak Osasun albisteak Medikuak Sindikatuak Lan gatazkak azken ordukoa