Gizartea -
Atxuri kalean
Lau atxilotu eta hiru ikertu Bilbon, gizon bati eraso egitea egotzita
Gehienak adingabeak dira eta lesio-delitu bat leporatzen diete. Biktimak zauri handiak izan ditu, Segurtasun Sailaren arabera.
Agentziak | EITB MEDIA
Ertzaintza, Bilboko Udaltzaingoarekin batera, hiru adingabe ikertzen ari da, eta hiru gizon eta emakume bat atxilotu ditu, horietako bi adingabeak, gizon bati egindako eraso batean parte hartzea egotzita.
Gertakariak atzo, ostiralean, izan ziren, 23:30ak aldera; une horretan, Ertzaintzak eta Bilboko Udaltzaingoak Atxuri kalean eraso bat gertatzen ari zelaren ohartarazpena jaso zuten, Segurtasun Sailak jakinarazi duenez.
Agenteak bertaratu zirenean, lurrean botata zegoen gizon bat aurkitu zuten, eta beste bi pertsona eraso egiten ari zitzaizkion. Horiek lasterka ihes egin zuten poliziak ikusi zituztenean.
Ertzainek gertatutakoari buruzko informazioa bildu zuten, eta ustezko erasotzaileen bila hasi ziren. Horri esker, erasoan parte hartu omen zuten zazpi pertsona atzeman zituzten.
Ertzainek 19, 18 eta 17 urteko hiru gizon eta 17 urteko emakume bat atxilotu zituzten lesio-delitua egotzita, eta beste hiru adingabe ikertzen ari dira, ustez gertakarietan parte hartzeagatik.
Atxilotuek eta erasotuak polizia-aurrekariak dituzte horrelako gertaerengatik, bai eta ondarearen aurkako delituengatik ere.
Atxilotuak ertzain-etxera eraman zituzten, eta, ondoren, Bilboko Guardiako Epaitegiaren esku utzi zituzten, adin txikikoak izan ezik, haien gurasoen ardurapean geratu baitziren, Bilboko Adingabeen Fiskaltzaren aginduz.
Bestalde, erasoa jasan zuen gizona Atxuri kalean bertan artatu zuten osasun-zerbitzuek, eta, ondoren, Basurtuko Ospitalera eraman zuten, zauriak zituelako.